2020: Wikimania
WIKIMANIA
Kuasa pisokodungan di mogikaakawo: Piilangan toilaan popotimung tongoulun
Longkod Konvensyen Bangkok
Centara Grand at CentralWorld
Bangkok, Thailand
Wikimania nopo nga persidangan tounan ii mamaramai toinsanan projek kokomoi koilaan poingukab ii pinaanjul do Yayasan Wikimedia – 
Wikimedia Commons, 
MediaWiki, 
Meta-Wiki, 
Wikibooks, 
Wikidata, 
Wikinews, 
Wikipedia, 
Wikiquote, 
Wikisource, 
Wikispecies, 
Wikiversity, 
Wikivoyage, 
Wiktionary – miampai tolu tadau do persidangan, pilumaagan, pirubaan, pinludaan, om bengkel. Hatus om lobi o sukarilawan om luguan toilaan poingukab , mantad sompomogunan mitimung do mibooboros isu, ruputan projek om ponginsamakan miampai mogiolon-olon tua pomusarahan.
Nosiliu o Edisi ko-16 diti do iso pisokodungan mantad do tongosukarelawan, cawangan om tinimungan momomoguno Wikimedia Asia Timur, Tenggara om Pasifik (ESEAP).
Tonudo yahai id media sosial: Facebook, Instagram om Twitter.
Natangguh o Wikimania gisom 2021.
Surat mantad Katherine Maher kumaa komuniti Wikimedia
18 March 2020
Kumaa toinsanan,
Soboogian nopo tisuli potilombus do Guraan Wikimedia montok monoguang pandemik COVID-19, maan dahai inoruai timpu do Wikimania Bangkok 2020. Nowonsoi o kootuson diti miampai sokodung poimponu do ESEAP sabaagi mononwalai om Komitikuasa Wikimania. Pohoroon o Wikimania id Bangkok ontok toun 2021.
Olunggui yahai tu au kaanu do mirumo miampai dokoyu id Bangkok ontok wulan Magus. Sundung do ingkaa, otumbayaan yahai do iti nopo nga kootuson di tosonong kopio montok kasanangan do komuniti global om kolidasan toinsanan do poimponu. Pinosogu o kootuson diti do panganjul ESEAP miagal di winonsoi pogun-pogun diolo montok monoguang pandemik COVID-19 om kopiunung do sogu mantad Koisaan Kolidasan Sompomogunan (WHO).
Tantu no kiwaa ogumu poguhatan dokoyu. Alansan daa yahai do monimbar piipiro poguhatan dokoyu id siriba. Tumilombus yahai do monimbar tuhot ngaawi dii id liwang Wikimania Meta-Wiki om id suang pibarasan tinimungan Telegram Wikimania (koilaan poinlobi id siriba).
Nunu komoyon do “inoruan timpu kopoindalanan” diti Wikimania?
Amu yahai papaanjul do Wikimania mitorungak ontok toun 2020 nga pouludon kawagu o Wikimania Bangkok gisom toun 2021. Tumilombus o tinimungan kotoinaan ESEAP do kumaraja sabaagi kolaboratif serantau montok puru kelompok id koiyonon Timur, Tenggara om Pasifik montok sumiliu mononwalai id Thailand do toun dumontol.
Hotel om tionon abaabayan id Bangkok nopo nga ii om ii. Au po dahai natantu o tadauwulan montok do 2021. Misokodung yahai miampai do tinimungan ESEAP om komitikuasa Steering Wikimania montok manantu tadauwulan kawawagu. Poiloon dahai o tadauwulan dii orikot o kolimpupuson toun do 2020.
Abal tosonong nopo nga, kopihondot o Wikimania 2021 do tadau kinolodion ko-20 do Wikipedia. Alansan yahai do osiliu o Wikimania do kaantakan di kibagas -- iso kosiwatan do mamaramai kopongoputan kawagu kalapas do nokotongkiad solinaid sontoun miampai do koinabasan di tagayo duo dekad toilaan poingukab.
Kiwaa nangku pomilian alternatif montok ababayan mitorungak?
Aiso o palan do mononwalai Wikimania 2020 do manganjul abaabayan maya do talian. Kiwaa kalaja om goos tagayo do kotoinaan Wikimania. Alansan o tinimungan ESEAP do papaanjul ababayan mitorungak di bobos osonong id Bangkok ontok toun 2021. Mantad dii, aiso o kapasiti do mongulud Wikimania id sawat talian do toun diti.
Sundung do ingkaa, kopuriman o Komitikuasa Wikiman, tinimugan tuan walai ESEAP om Yayasan Wikimedia do puru komuniti suai nopo nga aanangan kanto do mongulud abaabayan Wikimedia Global maya talian ontok toun 2020. Sundung do aiso kapasiti do Yayasan Wikimedia ontok timpu diti montok momuruan ponoinaan persidangan maya id talian, koilo om kopuriman yahai do ii nopo daa suai nga kigaab do momonsoi dii.
Mangalap yahai do pilumaagan kokomoi abaabayan id talian. Alapon o puru di aanangan do miromut miampai Komitikuasa Steering Wikimania om kakitangan Yayasan Wikimania montok mokianu pason id liwang bolikan Wikimania Meta-Wiki.
Pomusarahan nogi dahai dinondo o sogu montok popoingkawas tinori komuniti montok papaanjul pitimungan sawat talian id koiyonon sondii, om poingkuro yahai kaanu do monokodung komuniti do mongulud abaabayan Wikimedia tempatan om serantau maya spontan kalapas katalib o pandemik. Gama do nokosimban o kaantakan miampai osiau, kakal po yahai do minggoos montok manantu kointalangan poinralom om popoilang lobi gumu koilaan id piipiro minggu di rumikot.
Nunu komoyon diti montok do pangapalaian sikulasip?
Maamaso yahai do kumaraja do mamalan proses Wikimania 2020 scholarship applications. Poilangon dahai o koilaan diti id minggu dumontol.
Poingkuro owonsoi o kootuson?
Rekomendasi diti nopo nga nowonsoi do panganjul ESEAP tumanud do nunu i noilaan kokomoi pandemik kolidasan global COVID-19 dinondo om garis tonudon WHO di kawaawagu. Kootuson nopo nga winonsoi miampai do tinimungan ESEAP maya pilumaagan miampai Komitikuasa Steering Wikimania om Yayasan Wikimedia. Naanu o kootusan poimponu om osokodung ngaawi yolo kokomoi do kootusan diti.
Sundung do olunggui tomod yahai tu au nokosiwat do miruba miampai toinsanan poingompus toun diti, nga osokodung nogi yahai do kootusan diti montok kounalan toinsanan. Maya diti, kaanu o mononwalai ESEAP manahak tarad diolo kumaa kosusukupan paganakan diolo, komuniti Wikimedia tempatan om komuniti tempatan miampai pointongkop. Kopisudong o kootuson diti miampai tapanai kolidasan awam global om popiagal guraan Wikimedia sabaagi momomonsoi tonggungan i monokodung kasanangan montok toinsanan.
Aanangan yahai monongkotoluod do toinsanan sukarilawan om puru miniamung i nokohompit id pamalanan Wikimania. Mamagatang tomod yahai do sokodung ESEAP montok momuruan, kelenturan, om katabayan diolo tu minisokodung yahai do minomonsoi kootuson di apangkal kokomoi abaabayan toponsol diti.
Hinombo oku kaanu minsingilo miampai poinralom kokomoi Wikimania 2021?
Kiwaa piipiro wayaan hinombo insaru haro pibarasan kokomoi diti Wikimania om palan montok 2021 i maan poiloo tumanud do koburuon. Magalap yahai do toinsanan mampayat i aanangan do monimung toilan om kreativiti kolektif dahai montok pibarasan kokomoi nunu adadi do potilombus miampai Wikimania. Kokito kou do wayaan diti hiti:
- Wikimania wiki: https://wikimania.wikimedia.org/wiki/Wikimania
- Sanarai mel Wikimania: https://lists.wikimedia.org/mailman/listinfo/wikimania-l
- Saluran IRC Freenode: #wikimania
- Tinimungan mogibooboros Telegram: https://t.me/wikimaniachat
Hinombo oku kaanu mongilo miampai poinlobi kokomoi COVID-19 om Wikimedia?
Koilo yahai do komuniti Wikimedia nopo nga opuhawang om altruistik. Au yahai osuayan do ogumu sukarilawan i tumimpuun do momoguno kabaalan om perhatian diolo montok monoguang pandemik global ontok diti. Minomorun nogi o Yayasan wikimedia do liwang Meta-Wiki id nombo kaanu tokou mogiilang om momonsoi dokumentasi kokomoi laang-laang di pinowonsoi diolo om puru guraan om nogi woyo do mampayat id boogian. Magalap yahai dokoyu do mamung dahai doid dokumentasi di lobi aralom kokomoi tindakan kolektif: dahai https://meta.wikimedia.org/wiki/COVID-19
Pounsikou
Nokosimban miampai tosikap id piipiro minggu tohuri o pomogunan om koposion tokou. Sundung do ingkaa, milo tokou do monginmuri sajara montok mogihum koliwawoson tu maya krisis koinsoruan haro o timpu hinonggo popoiliu o tulun do pogisuusuayan, manahak kopoguluanan kumaa komuniti om koumoligan, miampai mogihum laang do miromut. Topurimanan komuniti om tudu id guraan Wikimedia nopo nga iso kapasarahan di agaras id timpu di au oiloilaan diti.
Iti no timpu do okon nopo ko nunu i wonsoyon tokou, nga poingkuro tokou nogi momonsoi dii miampaii kmanahak bagas di kirati kumaa pomogunan. Monongkotoluod kopio yahai montok toinsanan di winonsoi dokoyu sabaagi guraan montok monoguang tantaman id timpu diti.
Toririmo no do olidas om oumolig hinombo nopo.
Katherine, sabaagi mongongobi puru:
ESEAP Tinimungan Panganjul Teras
Wikimania Komiti Steering
Tinimungan Abaabayan Yayasan Wikimedia
P.S. Milo kou moguhup do papadalin om popoilang pason diti maya Meta-Wiki.
Milo kou nogi mogihum koilaan pomoruhang kokomoi koimaan-koimaan suai do Wikimedia i kipionitan do COVID-19 id Meta-Wiki:
--
Katherine Maher (isido)
Pengarah Eksekutif
Yayasan Wikimedia